മികച്ച നടിക്കുള്ള സംസ്ഥാന അവാർഡ് കിട്ടിയതിൽ അതീവസന്തോഷമുണ്ടെന്ന് അന്ന ബെൻ. ‘കപ്പേളയ്ക്ക് നോമിനേഷനുണ്ടെന്ന് അറിഞ്ഞിരുന്നു. ആരാധനയോടെ നോക്കിയിരുന്ന പല നടിമാരുടെയും മികച്ച കഥാപാത്രങ്ങൾ നോമിനേഷനിൽ ഉണ്ടായിരുന്നു. അതിനാൽ അവാർഡ് അപ്രതീക്ഷിതമാണ്. നല്ല സിനിമകളുടെ ഭാഗമാകാനായതിൽ സന്തോഷമുണ്ട്’–- അന്ന പറഞ്ഞു. അന്ന ബെൻ അവാർഡ് വിവരം അറിഞ്ഞത് പുതിയ ചിത്രം ‘നൈറ്റ് ഡ്രൈവി’ന്റെ ആലുവ ചൂണ്ടി ഭാരത് മാതാ സ്കൂൾ ഓഫ് ലീഗൽ സ്റ്റഡീസിലെ ലൊക്കേഷനിൽവച്ചാണ്. കുടുംബത്തിനും സഹപ്രവർത്തകർക്കുമൊപ്പം കേക്ക് മുറിച്ച് സന്തോഷം പങ്കിട്ടു . സംവിധായകൻ വൈശാഖ് മധുരം നൽകി. ആഘോഷത്തിൽ അച്ഛൻ ബെന്നി പി നായരമ്പലം, അമ്മ ഫുൽജ, സഹോദരി സൂസന്ന, നടൻമാർ ഇന്ദ്രജിത്, റോഷൻ മാത്യു, സന്തോഷ് കീഴാറ്റൂർ, പ്രശാന്ത് അലക്സാണ്ടർ എന്നിവർ പങ്കുചേർന്നു.
